Lliteratura. Revista Asturiana de Lliteratura ye una publicación periódica editada pola Academia de la Llingua Asturiana qu’agospia y asoleya la creación lliteraria n’asturianu y que fai por ver medrar la nómina d’autores na nuesa llingua.

La revista Lliteratura entama’l so camín en 1990 baxo la direición del escritor y académicu Xosé Bolado. Con un diseñu cabezaleru nel so momentu confiáu en Jorge León, escribía Bolado nel editorial del primer númberu que Lliteratura nacía col enfotu de comunicase col públicu llector, yá que consideraba que la lliteratura viva nun yera posible ensin receptor social. D’esta miente, col oxetivu d’amosar al públicu la fortaleza de la lliteratura asturiana que venía, la redaición allampaba pola normalización social de la llingua asturiana.

A partir del númberu 34 (2018) camuda la direición de la publicación, que recai na profesora, escritora y académica Marta Mori d’Arriba hasta anguaño. Dende esta nueva etapa, y trabayando sobre lo algamao nos dieciocho años anteriores, amiéstase un enfoque decidíu pola lliteratura de xéneru, dende’l que se fai por amosar la calidá de los testos escritos por muyeres y fomentar entá más la so producción. Poténciase, de la mesma manera, la seición de crítica, onde s’invita tanto a voces nueves como a les más consagraes a facer un repasu críticu poles publicaciones más novedoses. Nesta etapa, el diseñu, en manes de Marina Lobo hasta 2021, navega una estética más sobria, con un enclín pola xeometría y la elegancia.

Anguaño, Lliteratura sigue fiel a les intenciones primeres de la so fundación y construyi sobre unos cimientos fuertes l’amuesa lliteraria actual que tien pa ufiertar el país. Peles seiciones de poesía, narrativa, teatru, ensayu, traducción, entrevistes o crítica, maqueteaes y diseñaes con procuru y bon gustu, pasaron gran parte de les y los escritores d’Asturies, tanto n’asturianu como n’eonaviegu, amosando que la publicación sigue siendo’l llar lliterariu d’Asturies.